Kópavogskirkja

Á morgunn fimmtudaginn 25. febrúar verður opið hús á foreldramorgni í safnaðarheimilinu Borgum frá klukkan 10:00-12:00.

Í gær flutti Einar Benediktsson, fyrrverandi sendiherra fróðlegt erindi á “Máli dagsins” um utanríkismál í safnaðarheimilinu Borgum.  Fjallaði Einar meðal annars um starfsemi íslensku utanríksþjónustunar í byrjun og bar saman við starfið í dag.  Stundin hófst að venju með söng undir stjórn þeirra Friðriks Kristinssonar og Lenku Mátéová og lauk með helgistund.

Farið verður í fermingarferðalag í Vatnaskóg klukkan 08:00 frá safnaðarheimlinu (skáhalt á móti Gerðarsafni) þann 1. mars og áætluð heimkoma er um kaffileytið þann 2. mars.  Þau sem ekki hafa tilkynnt þáttöku í ferðina en ætla með. eru beðin um að gera það hið fyrsta með því að senda tölvupóst til kopavogskirkja@kirkjan.is Tekið verður við þátttökugjaldinu 5000 krónur við rútuna þann 1. mars.

Fermingarfræðsla er laugardaginn 6. mars á hefðbundnum tímum.

Aukatímar verða mánudaginn 8. mars frá klukkan 15:00-17:00 og fimmtudaginn 11. mars frá klukkan 15:00-16:30. Verða þau sem þangað eiga að mæta boðuð sérstaklega.

Æfingar fyrir fermingar verða sem segir og undirstrikað er mikilvægi þess að allir mæti á æfingar með þeim hóp sem þau fermast með:

Hópurinn sem fermist á Pálmasunnudegi 28. mars klukkan 11:00 mun æfa, laugardaginn 20. mars klukkan 13:00-13:45 og laugardaginn 27. mars klukkan 11:00-11:45.

Hópurinn sem fermist á Skírdegi 1. apríl mun æfa mánudaginn 29. mars klukkan 11:00-11:45 og þriðjudaginn 30. mars klukkan 11:00-11:45.

Hópurinn sem fermist sunnudaginn 11. apríl mun æfa þriðjudaginn 6, apríl klukkan 16:00-17:15 og laugardaginn 10. apríl frá klukkan 10:30-11:15.

Æft verður í Kópavogskirkju og foreldrar og eða forráðamenn beðnir að vera með sínum unglingum á fyrri æfingu hvers hóps.  Ef forföll verða vinsamlega tilkynnið þau á kopavogskirkja@kirkjan.is

Næstkomandi þriðjudag 23. febrúar n.k. mun Einar Þorvarðarson, framkvæmdastjóri Handknattleikssambands Íslands segja frá landsliðinu í handbolta og starfi þess í “Máli dagsins” en dagskráin hefst klukkan 14:30 með söng undir stjórn Friðriks Karlssonar við undirleik Lenku Mátéová.  Einar ræðir svo um landsliðið og stundinni lýkur klukkan 16:00 með stuttri helgistund.

Hefur þú áhyggjur og finnst þér stundum erfitt að líta björtum augum á tilveruna? Vilt þú auka gleðina í lífi þínu og/eða langar þig til þess að rækta trúna betur?

Ef eitthvað af ofannefndu á við þig gæti þetta námskeið hentað þér.

Á námskeiðinu verður fjallað um gleði og hamingju og hvað það er sem eykur lífsgleði fólks. Sérstaklega er fjallað um áhrif trúarinnar á lífshamingjuna og hvað Biblían hefur að segja um það. Kynntar eru markvissar leiðir til þess að efla gleðina í eigin lífi og þar á meðal „best geymda leyndarmálið“ um hvernig má öðlast hamingjuríkt líf.

Kennarar á námskeiðinu eru sr. Petrína Mjöll Jóhannesdóttir og sr. Bryndís Malla Elídóttir.

©Námskeiðið hefst þriðjudaginn 23. febrúar og lýkur 16. mars og er frá kl. 18.00-19.30 (4 skipti)

©Námskeiðið verður haldið í nýju safnaðarheimili Kársneskirkju í Kópavogi (gegnt Gerðarsafni)

©Létt hressing er í boði

©Það er opið öllum og þátttakendum að kostnaðarlausu

Skráning fer fram í gegnum síma Breiðholtskirkju: 587-1500 eða með tölvupósti profaust@centrum.is eða hjá Leikmannaskóla kirkjunnar kristin.arnardottir@kirkjan.is s: 528 4000

Námskeiðið er samstarfsverkefni Reykjavíkurprófastsdæmanna og Starfs- og leikmannaskóla kirkjunnar.

Guðsþjónusta verður sunnudaginn 21. febrúar n.k. í Kópavogskirkju klukkan 11:00. Á eftir guðsþjónustunni verður kynningarfundur um “Messuhópa” í kapellu safnaðarheimilsins “Borgum” sem er skáhalt á móti Gerðarsafni.

Á undanförnum árum hefur verið að þróast öflugt sjálfboðaliðastarf í nokkrum söfnuðum, að hluta til ávöxtur námskeiðsins Lifandi steinar, sem haldið hefur verið í Hallgrímskirkju í nokkur skipti.  Flest hinna sjálfboðnu starfa hafa komið að hjarta safnaðarlífsins, messu sunnudagsins, s.s. að bjóða fólk velkomið við kirkjudyr, sjá um söfnun fjár til góðra málefna, lesa ritningarlestra, aðstoða við útdeilingu og annast kirkjukaffið.

Í Kópavogskirkju verða stofnaðir nokkrir messuhópar í vor til að halda utan um þetta starf. Í hverjum þeirra er ætlunin að starfi 5-8 manns, fólk á ýmsum aldri.  Mun hver hópur gegna hlutverki messuþjóna á nokkra vikna fresti og funda í vikunni á undan til undirbúnings messunni með prestinum sem prédikar. Á þeim fundi verður m.a. rætt um guðspjall sunnudagsins og sú umræða hugsuð sem innlegg hópsins til prédikunarinnar. Þá verður aukin áhersla lögð á aðkomu hins almenna prestdóms að bænagjörðinni og munu hóparnir taka að sér að semja og lesa bænir við ákveðin tækifæri.  Sjálfboðið starf ætti að vera eðlilegur þáttur í lífi safnaðanna. Það er eðli kristinnar trúar að leita út og gefa af sér. Messuhóparnir í Kópavogskirkju eru ein leið til að finna þeirri þjónustu farveg.

Áhugasöm eru hvött til að koma á fundinn á sunnudaginn kemur.  Allar nánari upplýsingar gefur sr. Sigurður Arnarson (netfang: sigurdur.arnarson@kirkjan.is).

Fyrirbæna- og kyrrðarstund verður í Kópavogskirkju á morgunn klukkan 12:10.  Tekið er við fyrirbænarefnum á netfangið sigurdur.arnarson@kirkjan.is

Mál dagsins verður á morgunn, þriðjudaginn 16. febrúar í safnaðarheimilinu Borgum (gegnt Gerðarsafni) og hefst klukkan 14:30-16:00.  Stundin hefst á samsöng undir stjórn Friðriks Kristinssonar við undirleik Lenku Mátéová.  Tekið verður fyrir “mál dagsins” og að því loknu er helgistund rétt fyrir klukkan 16:00.

Sunnudaginn 14. febrúar verður guðsþjónusta í Kópavogskirkju klukkan 11:00.  Sr. Sigurjóns Árna Eyjólfsson, prédikar og þjónar fyrir altari. Lenka Mátéová, organisti stjórnar kór Kópavogskirkju.  Sunnudagskólinn í Borgum á sama tíma í umsjón Ingu Harðardóttur, Sigríðar Stefánsdóttur og Sólveigar Aradóttur.

Fleiri og fleiri sækja nú foreldramorgna í Kópavogskirkju sem eru á fimmtudögum frá klukkan 10:00-12:00:00 í safnaðarheimilinu Borgum.  Fimmtudaginn 18. febrúar næstkomandi mun sjúkraþjálfarinn Alma Guðjónsdóttir tala um mikilvægi hreyfingar.  Allir hjartanlega velkomnir.